A Mancomunidade da Mariña aproba por unanimidade unha moción dos populares para reclamar ao Goberno a modificación do estatuto electrointensivo incorporando as propostas da Xunta e dos traballadores de Alcoa

PP de Lugo | 2020-02-12

A moción de urxencia en apoio a Alcoa que presentaban os alcaldes do Partido Popular no pleno que celebraba este martes a Mancomunidade de Municipios da Mariña “foi aprobada coa unanimidade de tódolos representantes dos concellos da comarca”. Así o explica o alcalde popular do Concello de Xove, Demetrio Salgueiro, en representación dos rexedores do PP na comarca engadindo que se trata “dunha boa nova que esperemos que non se quede só nunha mera declaración de intencións ou nunha acción simbólica”.

 

Salgueiro defendeu o debate de urxencia sobre este asunto tras “coñecer o contido do estatuto para consumidores electrointensivos que non resolve os problemas da gran industria electrointensiva de España e menos os problemas de Alcoa”. Os populares pediron a través desta moción o apoio aos traballadores; ademais de “instar ao Goberno do Estado a levar a cabo as modificacións pertinentes, dentro da fase de alegacións, para acadar un prezo da enerxía que cumpra coas expectativas de Alcoa e posibilite a actividade da multinacional na Mariña”.

 

O popular sinala que “tendo en conta que 5.000 familias dependen da fábrica de Alcoa instalada nos municipios de Xove e Cervo, pedimos aos representantes do PSOE e do BNG na Mancomunidade que trasladen aos seus representantes en Madrid e tamén ao Goberno de Pedro Sánchez a necesidade de realizar estes cambios” e que se axusten ás propostas da Xunta e dos traballadores de Alcoa co fin de garantir o futuro da industria de San Cibrao.

 

O rexedor xovense recorda que “son 1.100 os empregos directos que xera a planta de San Cibrao aos que hai que engadir os traballadores indirectos. Pero tamén as empresas de servizos e os comercios están a vivir da riqueza que xera esta importante fábrica na Mariña polo que é necesario que poida seguir a súa actividade con total garantía”.

 

Salgueiro insiste en que “o prezo que sae resultante deste estatuto é incluso superior ao que tiña Alcoa nos anos anteriores e, polo tanto, esiximos que se tomen as medidas necesarias para baixar ese prezo a un nivel competitivo que permita traballar á empresa en igualdade de condicións e cos mesmos prezos que teñen outros países de Europa coma Francia ou Alemaña onde o prezo do megavatio é moito máis baixo”.

 

Deste xeito, o alcalde popular advirte que “se non é así, Alcoa estaría incluso ameaza de peche o que sería unha traxedia para A Mariña e toda a provincia de Lugo”.

 

Medidas insuficientes

 

Os populares aseguran que “as medidas avanzadas polo Goberno son insuficientes. Son as mesmas que levou hai 20 días á mesa de traballo na que a propia Alcoa xa lle advertiu de que non eran suficientes”. Dende o PP de Lugo consideran que Galicia precisa un prezo eléctrico competitivo e estable: rebaixar o prezo ata os 35-40 €/MWh para que a industria electrointensiva traballe en igualdade de condicións que o resto de Europa.

 

Por outra banda, dende o PP lucense lamentan que para a elaboración do estatuto “non se tiveran en conta as propostas galegas, como a creación da figura de consumidores hiperelectrointensivos”. E, ademais, condenan que “pasamos de 119 posibles beneficiarias a 276 no borrador e 600 no actual (só 31 en Galicia)”. Por iso entenden que “con este estatuto, o Goberno vai na dirección correcta se quere acabar co aluminio primario en Alcoa-San Cibrao igual que fixo en Alcoa-Coruña”.